చంద్రవంచ గ్రామ ప్రజలకు తన కృతజ్ఞతలు తెలిపారు సీఎం రేవంత్ రెడ్డి. రాష్ట్ర ప్రభుత్వం చేపట్టిన నాలుగు పథకాలు ఈ గ్రామం నుంచి ప్రారంభం కావడం సంతోషంగా ఉందని పేర్కొన్నారు. కొడంగల్ నియోజకవర్గం రాష్ట్రానికి ప్రత్యేకమైన స్థానంలో నిలుస్తుందన్నారు. రైతులకు కాంగ్రెస్ పార్టీతో అనుబంధం గొప్పది. కాంగ్రెస్ ప్రభుత్వం గతంలో ఉచిత కరెంట్ అందించిన ఘనత తనదే అని, 78 వేల కోట్లతో రుణమాఫీ చేసి రైతులకు ఊరట కల్పించిందని గుర్తుచేశారు. ఆ మంచి పనుల వారసత్వాన్ని కొనసాగిస్తూ కాంగ్రెస్ ప్రభుత్వం ప్రజా పాలన అందిస్తోందని, మొదటి విడతలోనే 7 వేల కోట్ల రూపాయలను రైతుల ఖాతాల్లో జమ చేశామన్నారు.
సీఎం రేవంత్ రెడ్డి దావోస్‌లో జరిగిన చర్చల్లో పాల్గొని నాలుగు రోజుల్లోనే రాష్ట్రానికి రూ.1.78 లక్షల కోట్ల పెట్టుబడులు తెచ్చిన ఘనత తనదే అని గుర్తు చేశారు. అన్ని రాష్ట్రాల ముఖ్యమంత్రుల్లో ముందువరుసలో నిలిచి అభివృద్ధి పథంలో తెలంగాణను తీసుకెళ్లడమే తన లక్ష్యమని అన్నారు. అభివృద్ధితోపాటు రాష్ట్రంలో సంక్షేమ పథకాలు అమలు చేసే బాధ్యతను తాను పూర్తి నిబద్ధతతో తీసుకుంటానని తెలిపారు.
రైతు భరోసా కింద ఈ రోజు రాత్రి 12 గంటల నుంచి ఎకరాకు 6 వేల రూపాయలు ఖాతాల్లో జమ చేయనున్నామని వెల్లడించారు. దేశంలో ఎక్కడా చేయని విధంగా రెండు లక్షల రుణమాఫీ చేసి, రాష్ట్రంలో రైతులకు కాంగ్రెస్ ప్రభుత్వం చరిత్ర సృష్టించిందన్నారు. 55 వేల ప్రభుత్వ ఉద్యోగాలు కల్పించామని, గ్యాస్ సిలిండర్‌ను 500 రూపాయలకే అందిస్తున్నామని పేర్కొన్నారు. ఆడబిడ్డల కోసం ఉచిత బస్సు సౌకర్యాన్ని అందుబాటులోకి తెచ్చి, ఆర్టీసీకి 4 వేల కోట్ల రూపాయలు విడుదల చేసినట్టు వివరించారు.
ఇందిరమ్మ ఇండ్ల విషయంలో కాంగ్రెస్ సంకల్పం స్పష్టమని, 2024 మార్చి 31 నాటికి 3500 ఇండ్లు కట్టించి అందించనున్నామని తెలిపారు. రాబోయే నాలుగేళ్లలో 15 వేల నుంచి 20 వేల ఇండ్లను నిర్మించేందుకు కృషి చేస్తామన్నారు. బీఆర్ఎస్ ప్రభుత్వం రేషన్ కార్డుల కోసం పట్టించుకోలేదని, కానీ తమ ప్రభుత్వం పేదవారి కోసం వాటిని క్రమబద్ధంగా అందిస్తున్నదని వివరించారు.
పాలమూరు-రంగారెడ్డి, నారాయణపేట సాగునీటి ప్రాజెక్టులను పూర్తి చేసి, రాష్ట్ర అభివృద్ధికి తాము కట్టుబడి ఉన్నామని సీఎం రేవంత్ రెడ్డి స్పష్టం చేశారు.
