ఆంధ్రప్రదేశ్‌ రాష్ట్రంలో టాటా గ్రూప్ పెట్టుబడులపై ముఖ్యమంత్రి చంద్రబాబు నాయుడు ప్రత్యేక దృష్టి సారించారు. టాటా గ్రూప్ చైర్మన్‌ నటరాజన్‌ చంద్రశేఖరన్‌తో భేటీ అయ్యి రాష్ట్రంలో పారిశ్రామికాభివృద్ధి, ఐటీ, సౌర, పర్యాటక రంగాల్లో పెట్టుబడులపై చర్చించారు. టాటా గ్రూప్ రాష్ట్రవ్యాప్తంగా 20 హోటళ్లను ఏర్పాటు చేయడంపై చర్చలు జరిపారు. అలాగే టాటా పవర్ ద్వారా 40 వేల కోట్ల రూపాయలతో సోలార్, విండ్ ప్రాజెక్టులను చేపట్టే ప్రతిపాదన వచ్చింది.
విశాఖపట్నంలో టీసీఎస్‌ ఐటీ డెవలప్‌మెంట్ సెంటర్ ఏర్పాటుకు ప్రభుత్వం అనుమతి ఇచ్చింది. ఈ సెంటర్ ద్వారా 10,000 ఉద్యోగాలు కల్పించాలనే లక్ష్యంతో ముందుకు వెళ్తున్నారు. ఈ నేపథ్యంలో టీసీఎస్‌ ప్రతినిధులు విశాఖలో భవనాలను పరిశీలించారు. మిలీనియం టవర్స్‌ లీజు కోసం చర్చలు జరుగుతున్నాయి.
అంతేకాకుండా, టాటా గ్రూప్ పారిశ్రామికాభివృద్ధిలో తమ పాత్రను పెంచేందుకు సిద్దంగా ఉందని పేర్కొంది. టాటా గ్రూప్ 5 గిగావాట్ల సామర్థ్యంతో సోలార్, విండ్ ప్రాజెక్టుల కోసం ప్రతిపాదనలు రూపొందించింది. వీటితో పాటు ఆంధ్రప్రదేశ్‌ ప్రభుత్వం పర్యాటక రంగంలో ముందంజ వేయడానికి టాటా హోటల్స్‌ ఆధ్వర్యంలో వివిధ బ్రాండ్ల 20 హోటళ్ల ఏర్పాటుకు కృషి చేస్తోంది.
ప్రాథమిక ఆరోగ్య రంగంలో ఆర్టిఫిషియల్ ఇంటెలిజెన్స్, ఇతర సాంకేతిక సహకారం టాటా గ్రూప్ నుంచి ఏపీ ప్రభుత్వం కోరుతోందని చంద్రబాబు పేర్కొన్నారు. అలాగే, ప్రతి ఇంట్లోనూ ఎంటర్‌ప్రెన్యూయర్‌ను తయారుచేయాలనే ఆంధ్రప్రదేశ్‌ ప్రభుత్వ విజన్‌ను ప్రతిపాదించారు. ఈ లక్ష్యాన్ని సాధించేందుకు రతన్ టాటా ఇన్నోవేషన్ హబ్‌ను ఏర్పాటు చేయనున్నట్లు తెలిపారు. ఈ చర్యలు రాష్ట్ర పారిశ్రామిక అభివృద్ధికి కీలకమైన మార్గంగా మారతాయని ఆయన ట్వీట్‌ ద్వారా వెల్లడించారు.
