గేమ్‌ ఛేంజర్‌ మూవీ ప్రమోషన్స్‌ జోరందుకుంటున్న వేళలో గ్లోబల్‌ స్టార్‌ రామ్‌చరణ్‌ కడప టూర్‌ అభిమానుల్లో ఆసక్తి రేపుతోంది. కడప పెద్ద దర్గాను దర్శించుకోబోతున్న రామ్‌చరణ్‌ ఆ తర్వాత ఉరుసు ఉత్సవాల్లో పాల్గొనబోతున్నారు. ఈనాడు జరగనున్న అమీన్‌పీర్‌ దర్గా 80వ నేషనల్‌ ముషాయిరా గజల్‌ ఈవెంట్‌కు ముఖ్యఅతిథిగా రామ్‌చరణ్‌ హాజరవుతారు.
ఇందుకోసం, ప్రత్యేక విమానంలో హైదరాబాద్‌ బేగంపేట్‌ ఎయిర్‌పోర్ట్‌ నుంచి సాయంత్రం ఐదున్నరకు కడప బయలుదేరనున్నారు. ఆరున్నరకు కడపలో ల్యాండ్‌ అయ్యే రామ్‌చరణ్‌ అక్కడి నుంచి ఈవెంట్‌ స్థలానికి భారీ ర్యాలీగా వెళ్తారు. రామ్‌చరణ్‌ రాకతో అభిమానులు భారీగా తరలివచ్చే అవకాశం ఉండటంతో, ఈవెంట్‌ నిర్వాహకులు ప్రత్యేక ఏర్పాట్లు చేశారు. గజల్‌ ఈవెంట్‌ సమీపంలో ఎలాంటి అసౌకర్యం కలగకుండా జాగ్రత్తలు తీసుకుంటున్నారు.
శనివారం ప్రారంభమైన కడప పెద్ద దర్గా ఉరుసు ఉత్సవాలు ఈనెల 20వరకు కొనసాగనున్నాయి. మొదటి రోజు గంధం కార్యక్రమం ఘనంగా నిర్వహించగా, తర్వాత రోజు ఉరుసు ఉత్సవం జరిగింది. ఈవెంట్‌ హైలైట్‌గా గంధం మహోత్సవానికి ఆస్కార్‌ అవార్డు గ్రహీత ఏఆర్‌ రెహ్మాన్‌ కుటుంబంతో హాజరయ్యారు.
ఇవాళ జరిగే ముషాయిరా గజల్‌ ఈవెంట్‌లో రామ్‌చరణ్‌ ప్రత్యేక ఆకర్షణగా నిలవనున్నారు. అభిమానుల సందడి మధ్య ఈవెంట్‌ మరింత ప్రత్యేకతను సంతరించుకోనుంది. 20వ తేదీ రాత్రి పది గంటలకు నిర్వహించే ఊరేగింపుతో ఉత్సవాలు ముగియనున్నాయి. ఈ వేడుకలు చరణ్‌ హాజరుతో మరింత ప్రాధాన్యతను సంతరించుకున్నాయి.
