యంగ్ హీరో కిరణ్ అబ్బవరం ప్రధాన పాత్రలో నటించిన తాజా సినిమా ‘క’ (KA) ప్రస్తుతం బాక్సాఫీస్ వద్ద సెన్సేషన్ క్రియేట్ చేస్తోంది. గ్రామీణ నేపథ్యంలోని పీరియాడికల్ థ్రిల్లర్ గా తెరకెక్కిన ఈ సినిమాలో కిరణ్ అబ్బవరం సరసన తన్వీ రామ్, నయన్ సారిక హీరోయిన్స్ గా నటించారు. ఈ సినిమా దీపావళి కానుకగా అక్టోబర్ 31న విడుదలై మంచి విజయాన్ని సాధించింది. సుజీత్ మరియు సందీప్ కలిసి దర్శకత్వం వహించిన ఈ చిత్రం, విడుదలైన మొదటి రోజు నుంచే పాజిటివ్ టాక్ సంపాదించుకుని బ్లాక్ బస్టర్ గా నిలిచింది.
‘క’ సినిమా తొలి రోజు ఇండియన్ బాక్సాఫీస్ వద్ద రూ. 3.8 కోట్ల వసూళ్లు రాబట్టగా, ఇతర రాష్ట్రాలు మరియు ఓవర్సీస్ లో కూడా అదిరిపోయే వసూళ్లు సాధించింది. ప్రపంచవ్యాప్తంగా తొలి రోజు రూ. 6.18 కోట్ల గ్రాస్ వసూళ్లు నమోదు చేసింది. రెండవ రోజు కూడా సినిమా కలెక్షన్లు జోరు కొనసాగిస్తూ రూ. 3 కోట్ల వసూళ్లు సాధించగా, రెండు రోజుల్లో రూ. 6.80 కోట్ల కలెక్షన్లను భారత బాక్సాఫీస్ వద్ద రాబట్టింది. మొత్తంగా, రెండు రోజుల్లో ప్రపంచవ్యాప్తంగా ‘క’ సినిమా రూ. 10.25 కోట్ల గ్రాస్ వసూళ్లను కొల్లగొట్టింది.
కిరణ్ అబ్బవరం, వరుస ఫ్లాపుల తర్వాత ఈ సినిమాతో మంచి కమ్ బ్యాక్ అందుకున్నారు. ప్రీమియర్లు, మొదటి రోజుకే సూపర్ హిట్ టాక్ రావడంతో మౌత్ టాక్ బాగా పెరిగి, షోల సంఖ్య పెరిగింది. ఈ సినిమా కిరణ్ అబ్బవరం కెరీర్ లో అత్యుత్తమ ఓపెనింగ్స్ అందించిన చిత్రంగా నిలిచింది. సినిమా అన్ని చోట్లా పాజిటివ్ రెస్పాన్స్ ను రాబడుతోంది. ప్రముఖులు ఈ సినిమాను చూసి చిత్ర బృందాన్ని అభినందించారు. ఇది కేవలం కిరణ్ అబ్బవరం నటన మాత్రమే కాకుండా, దర్శకుల ప్రతిభ, సాంకేతిక నిపుణుల కృషికి తగ్గ ప్రతిఫలంగా ప్రేక్షకులు ఈ చిత్రాన్ని ఆదరిస్తున్నారు.
