టాలీవుడ్ వివాదాస్పద దర్శకుడు రాంగోపాల్ వర్మ మరోసారి వివాదంలో చిక్కుకున్నారు. ఆంధ్రప్రదేశ్‌లోని ప్రకాశం జిల్లా మద్దిపాడు పోలీస్ స్టేషన్‌లో ఆయనపై ఐటి చట్టం కింద కేసు నమోదైంది. ఈ కేసు విచారణ కోసం నవంబర్ 19న మద్దిపాడు పోలీస్ స్టేషన్‌కు హాజరుకావాలంటూ వర్మకు పోలీసులు నోటీసులు అందజేశారు.
ఈ వివాదం వర్మ చిత్రం వ్యూహం ప్రమోషన్ల సమయంలో తలెత్తింది. వర్మ తన సోషల్ మీడియా వేదిక ఎక్స్‌లో తెలుగుదేశం పార్టీ అధినేత చంద్రబాబు నాయుడు, జనసేన అధినేత పవన్ కళ్యాణ్, నారా లోకేష్, నారా బ్రాహ్మణిలపై అనుచిత వ్యాఖ్యలు చేశారన్న ఆరోపణలతో టీడీపీ ప్రధాన కార్యదర్శి ఎం. రామలింగం మద్దిపాడు పోలీస్ స్టేషన్‌లో ఫిర్యాదు చేశారు. ఫిర్యాదు ఆధారంగా నవంబర్ 10న వర్మపై కేసు నమోదు చేసి, దర్యాప్తు ప్రారంభించారు.
వ్యూహం సినిమా 2024 మార్చి 2న విడుదల కాగా, ఆంధ్రప్రదేశ్ రాజకీయ పరిణామాలను ఆధారంగా చేసుకుని ఈ చిత్రం రూపొందించబడింది. దివంగత ముఖ్యమంత్రి వైఎస్ రాజశేఖర్ రెడ్డి హెలికాప్టర్ ప్రమాదంలో మరణం నుంచి ఆయన కుమారుడు వైఎస్ జగన్‌ సీఎం అయ్యే వరకు జరిగిన కీలక సంఘటనలను ఈ సినిమాలో నాటకీయంగా చూపించారు.
సినిమా విడుదలకు ముందే టీజర్, ట్రైలర్‌లతో వివాదాలు చెలరేగాయి. టీడీపీ నేతలు ఈ సినిమాపై తీవ్ర అభ్యంతరం వ్యక్తం చేస్తూ, చంద్రబాబు నాయుడు, పవన్ కళ్యాణ్, నారా లోకేష్‌లపై తప్పుడు ప్రచారం చేశారని ఆరోపించారు. దీని ఫలితంగా మద్దిపాడు పోలీస్ స్టేషన్‌లో వర్మపై ఐటి చట్టం కింద కేసు నమోదైంది. ప్రస్తుతం పోలీసులు వర్మ నివాసానికి చేరుకుని విచారణకు హాజరుకావాలంటూ నోటీసులు జారీ చేశారు. వర్మ ఈ నోటీసులకు ఎలా స్పందిస్తారన్నది ఆసక్తిగా మారింది.
