తెలంగాణ రాష్ట్ర ప్రభుత్వం బీసీ రిజర్వేషన్లు, ఎస్సీ వర్గీకరణపై అత్యంత వేగంగా ముందుకు సాగుతోంది. రాష్ట్రంలో మొత్తం 3 కోట్ల 54 లక్షల మంది ఇచ్చిన వివరాలు ప్రభుత్వ అధికారుల వద్ద ఉన్నాయని తెలుస్తోంది. ఈ క్రమంలో కోటీ 12 లక్షల 15 వేల కుటుంబాల వివరాలు నమోదు చేయడం విశేషం. కులగణన ప్రకారం, 96 శాతం జనాభా ఈ సర్వేలో పాల్గొంది.
సర్వే లెక్కల ప్రకారం, రాష్ట్రంలో బీసీ జనాభా 46.25 శాతం కాగా, ముస్లిం మైనారిటీల్లో బీసీల జనాభా 10.08 శాతంగా ఉంది. దీంతో మొత్తం బీసీ జనాభా 56.33 శాతంగా తేలింది. మరోవైపు, ఓసీ జనాభా 15.79 శాతంగా ఉండగా, ముస్లిం మైనారిటీల్లో ఓసీ జనాభా 2.48 శాతమేనని తేలింది. మొత్తం ముస్లిం మైనారిటీ జనాభా 12.56 శాతంగా నిర్ధారణ అయ్యింది. ఎస్సీ జనాభా 17.43 శాతం కాగా, ఎస్టీ జనాభా 10.45 శాతంగా లెక్క తేలింది.
ఎస్సీ వర్గీకరణకు సంబంధించి సుప్రీంకోర్టు ఇచ్చిన తీర్పును అమలు చేసేందుకు రాష్ట్ర ప్రభుత్వం పూర్తిస్థాయిలో కసరత్తు చేసింది. కేబినెట్ సబ్ కమిటీ, ఏకసభ్య జ్యూడిషియల్ కమిషన్ సిఫారసులు ప్రభుత్వానికి అందాయి. ఇవాళ శాసనసభ ప్రత్యేక సమావేశంలో ఈ అంశాలపై చర్చించనున్నారు. ముఖ్యమంత్రి రేవంత్ రెడ్డి ఇచ్చిన హామీని నిలబెట్టుకోవాలని ఎమ్మార్పీఎస్ డిమాండ్ చేస్తోంది.
మరోవైపు, కాంగ్రెస్ పార్టీ మాజీ సీఎం కేసీఆర్ సభకు హాజరై చర్చలో పాల్గొనాలని కోరింది. కేసీఆర్ హాజరవుతారా? లేదా? అనే విషయం ఆసక్తికరంగా మారింది. బీసీలకు ఎన్నో ఏళ్ల తర్వాత మేలు జరగబోతుందని ప్రభుత్వం చెబుతోంది. ఈ నిర్ణయాలకు ఎవరైనా అడ్డుపడితే సహించేది లేదని మంత్రి పొన్నం ప్రణీత్ హెచ్చరించారు. కులగణన కోసం పోరాడిన వారందరికీ అభినందనలు తెలిపారు. ముఖ్యంగా, కేసీఆర్ కుటుంబం సర్వేలో పాల్గొనలేదని విమర్శలు వెల్లువెత్తుతున్నాయి.
ఈ చర్చల నేపథ్యంలో తెలంగాణలో రిజర్వేషన్లు, వర్గీకరణలు ఏ మలుపు తిరుగుతాయో చూడాలి!
